من أنا

خلّينا نتعرّف

إن كان ده أول تعارف بيننا، فتقدر تناديني إسلام، من غير أستاذ ولا باشمهندس.

اتولدت في القاهرة سنة 1993. ومش فاكر إني حصلت على شهادات معتمدة من جامعات دولية تؤهلني للعمل كـ Software Engineer، لكن اللي فاكره كويس إن عملاء كتير كانوا راضيين عن شغلي، وإنّي بنيت — بفضل الله — سمعة كويسة ساعدتني أكمل الرحلة بنفس الشغف من سنة 2012، من غير ما أصرف دولار واحد على الدعاية أو التسويق.

وجود كمبيوتر في بيتنا من منتصف التسعينيات تقريبًا — وهو أمر لو تعلمون عظيم — ادّاني أول وأكبر فرصة خدتها في حياتي: إني أستكشف عالمًا جديدًا ماكنتش أعرف إنه موجود من الأساس، ولا كنت هعرفه لولا فضل ربنا، ومن بعده أبويا الغالي ❤️

وبعدها تيجي الصدفة وتدّيني تاني أكبر فرصة في حياتي، لما وقع في إيدي كتاب بالعربي بيتكلم عن لغة اسمها BASIC (البيزيك)، في سن بدري جدًا، قبل حتى ما أكون أتقنت اللغة العربية نفسها :)

بس بقى... من هنا بدأت رحلة اكتشاف إزاي ممكن تبني حاجات تشتغل جوه العالم الرقمي ده.

قلة مصادر المعرفة والتعلّم، وعدم وجود إنترنت وقتها، كانوا حارميني من حاجات كتير؛ أهمها إني ماكنتش أعرف إن اللي بعمله ده ممكن يجيب فلوس :)

وهنا بدأت رحلة تانية خالص...

خلال الرحلة

اشتغلت على تطوير مشروعات في مجالات مختلفة، منها:

تطبيقات ومنصات التعليم LMS، والأدوات والتطبيقات الخدمية Utilities، ومنصات التجارة الإلكترونية eCommerce، ومواقع الشركات التعريفية، وصفحات الهبوط Landing Pages، وغيرها.

كمان تعاونت مع عدد من الشركات في تنفيذ مشروعات بأحجام مختلفة داخل السوق المصري والخليجي، وساعدت بعضهم في ترجمة احتياجات العمل إلى حلول وأنظمة رقمية عملية، وفي وضع خطط مناسبة للتحول الرقمي.

بعيدًا عن الشغل بقى

أفضل الهدوء، وأكره الضجيج بشكل عام؛ حتى الضجيج اللي جوا رأسي أكرهه.

الاحترام والصدق في التعامل هما مفاتيحك لدخول قلبي.

أكره الكذب، والكذاب، وأصحابه وجيرانه.

الرياضة جزء مهم من حياتي، وليها فضل كبير عليّ؛ علمتني الأدب، وضبط النفس، والترفع عن تفاهات الأمور.

والفلوس كمان مهمة جدًا، ومش هحاول أقنعك بغير كده. لكن مجرد إن الفلوس معاك، مش معناه إنك بقيت مهم بنفس الدرجة — على الأقل في نظري — لسه هتحتاج شوية إثباتات تانية عشان قيمتك تعلى عندي.